Shanti Basauri

Enbata

"Laino beltzak zeruan, dardara lurrean..."
Horrela hasten da Olatz Zugastiren abesti zoragarri bat.

Laino beltzak zeruan, dardara lurrean, artegatasuna haizean, kamusada.
Eguraldi ona behar det.

Atxikimendua, txikien mundua, mundua txikitzen

Arriaga Antzokiak ekoiztutako "Abentura Antzokian" obra bukatu zan. Izugarrizko esperientzia izan da guztiontzat, artista trebez osatutako talde erraldoi honetan.

Aldagelen giroa, entseuak, haurren aurpegiak, piratak, Txan magoa, Soroiz, beste musikariak, jantzien arduradunak, kafe-makina, administrazioan lan egiten dutenak, teknikariak, Txukus, Joe, Juanjoren burutaldiak, barneko megafonia, Julenen gidoia, eszenografia, eta... pertsonaiak.

Hemen, erretinan grabaturik, daramatzat Palindromo, Anizeto Alfabeto, Ipuin-kontalariak, Beldurra eta abar.
Han behin negar egin nuen.
Bi aldiz igo nintzen azkenengo solairura lo egitera.
Hiru aldiz erosi nituen sarrerak.
Lau aldiz izkutu nintzan sustoak emateko.
Bost aldiz pianoa jo nuen bakardadean.
Sei aldiz edo handikan jan nuen.
Zazpi aldiz ikusi nuen euskarazko bertsioa, osorik.
Zortzi aldiz esan nien etxekoei juteko.
Bederatzi aldiz gorroto nuen Txukusen eskusoinua.
Hamar mila aldiz barre egin nuen.

Hagakure

Hagakure hiru lagunek osatutako talde berri baten izena duzue. Hirukotearen kideok gara:

- Ales Larrazabal, pianoa.
- Joe González, saxofoiak, flauta eta klarineteak.
- Shanti Basauri, kitarra eta perkusioa.

Lehendabiziko kontzertu honetan oso doinu gutxi izango dira, bainan instrumentazioa eta moldaketa batzuk frogatzeko aprobetxatuko dugu, Santutxuko ikastetxe baten kultur jarduera batzuen bitartez.
Hagakure hitzak "hostopean izkututa" esan nahi du japonieraz, eta Yamamoto Tsunetomoren liburuxka ospetsu baten izenburua da. Yukio Mishimak, ene idazle japoniarrik preziatuenetako bat, beti begiratzen zuen urte askotan zehar.

Arriaga Antzokian

Udaberria entseuez beteta hasi ginan. Musikariok, antzezlariek etab. oso gogorki eta gustora lan egin degu "Abentura antzokian" obra berria betetzeko eta, azkenik, estreinaldiaren datak iritsi dira.

Ekoizpen hau Bilboko Arriaga antzokiarena da eta hiru ataletan ezberdintzen da. Nik lehenengoaren musika idatzi det, Hortzmugaren "Alfabeto A" obran hain zuzen ere. Julen Gabiria idazle trebeak gidoi poetiko bat idatzi du eta Jose Ibarrolak ere izugarrizko lana egin du irudi eder asko eraikitzen.

Musikagintzaren aldetik, Joe Gonzalez (klarinetea eta saxoa) eta Ales Larrazabal (pianoa eta eskusoinua) musikariekin berriz lan egitea txit ohore handia izan da. Haiek ene partiturak goratzen dituzte egunero, antzokiaren funtzio bakoitzean.
Lan talde (musikariak, antzezlariak, teknikariak) liluragarri bat eta gune berezi bat: Arriaga antzokia, osorik bahituta guretzat.

Maiatzaren bukaera arte ikus-entzun dezakezue han.