Hortzmuga Teatroa konpainiak 20 urte bete ditu aurten, eta ospatzeko, erakusketa berezi bat prestatzen ari dira. Gainera, haien lana etengabekoa denez, klown obra bat estreinatuko dute Viladecanseko Antzerki Festibalean: "Olympikas".
Zsutroia Hondo, Hetta Miller, Rula Tagarroto eta Odin Parkman kirolariak Arkadia herrikoak dira eta haien kirol xelebreak eraman nahi dituzte hurrengo Olinpiadetara. Hortarako, guztion sinadura behar dute, sinesgarritasuna nolabait lortzeko.
Arkadiako "Himnoa" egitea eskatu zidaten eta horixe izan da nire oparia haien hogeigarren urtebetetzeagatik.
Bart ene azkenengo obra sinfonista estreinatu nuen, musikari trebez inguratuta, Gaudeamus abesbatzarekin, Kukai dantza konpainiarekin, etab.
B.E.C.-en antolatutako EFEF (European Future Energy Forum) kongresuaren hasiera ospatzeko agindu zidaten. Ekoizpena, erraldoia zena, Inneventoren eskuetan zetzan, soinua eta argiketa Audiomicek egin zituen eta plazer handia izan zen Jon Maya (Kukai), Juli Foruria (Gaudeamus, abesbatzak oso lan ona osatu zuen) eta besteekin lan egitea.
Hemen entzun dezakezue:
Aipatutakoez gain, nirekin agertokian egon ziren musikariak hauek izan ziren:
- Mikel Ugarte & Harkaitz Martínez (Oreka TX, txalaparta)
- Aritz Urrutia (baxua)
- Ernesto Ruiz (tinbalak eta darbuka)
- David Larrinaga (sitar eta ahotsa)
- Gaudeamus (haur abesbatza)
Oso hilabete estresantea izan da, Japoniatik itzuli eta obra hau konposatu eta zuzendu behar (eta prozesuaren erdian Alemanian eta Frantzian egindako lana) baina merezi izan du. Dana ondo irten zan, artista eta teknikariek ondo egin zuten eta publikoari asko gustatu zitzaion. Artista gehienekin esperientzia luzea neukan eta niretzat berriak izan direnak ezinbestekoak bihurtu direla aitortu behar det.
Laster bideo bat jarri ahalko det baina, oraingoz, argazkia klika ezazue, ikuskizunaren magnituteaz ohartzeko. Obrak 12 minutu dirau eta denbora hortan denetarik gertatu zen agertokian.
Aubagnen egon ginen asteburu hontan, "Momento" obraren azkenengo saioan. Herri bitxia, azoka itzel batekin eta, Holzminden herriarekin parekatuz, garestitxua. Antzezlan hau anitz aldatu da azkenengo saioetan zehar, zehatzagoa bihurtu baita, argiagoa esan genezake. Frantziar webgune honetan argazki batzuk jarri dituzte, guretzat agurpen irudiak izan daitezkeenak. Antzezlan honetarako egin nuen musika, orain dela hiru urte edo, asko aldatu da eta, azkenean, pena emango dit agurtzeak. Batez ere, pianoaren partiturarekin nahiko pozik geratu nintzen eta tresna horretan eduki ditugun interpretekin (Ales Larrazabal eta Malen Zobaran), maisuki defenditu zutenak, oso une bereziak bizi izan ditut. Eskertzekoa da ere, Joe Gonzalezen lana klarinetearekin, eta Alberto Bañosena, deskubrimendu ederra izan dena, oboista moduan bai eta arlo pertsonalean ere.
Azkenengo bidai honetan kide hauek egon ginen, Larruako Pío Ortíz de Pinedo eta Hortzmugako Raul Cancelorekin batera:
Antzezlariak
Leire Ucha
Pako Revueltas
Enriqueta Vega
Musikariak
Alberto Baños (oboe)
Malen Zobaran (piano)
Shanti Basauri (gitarra)
Aubagnen bertan beste konpainia euskaldun bat topatu genuen, Gaitzerdi, haien "Otsoko" obrarekin.
Holzminden herrirantz abiatu gera, "Momento" antzezlanarekin. Herria, eguraldia, giroa eta jendea hobezinak dira. Lau egun hauetan bi saio eskainiko ditugu hemengo Festibalean eta datorren astean Frantziara jungo gera, Marsella aldean dagoen herri batera.
Holzminden Hannoverreko eskualdean dago eta hemen dauzkaten ezaugarririk goxoenak saltxitxa eta mustarda naturalak dira. Zalantzarik gabe.
Jatekoaz gain, denbora profitatu det abesti bat egiteko Oreinak taldearentzat eta, hemendik itzuli eta gero, BEC-en estreinatuko dudan obrarako entseuekin hasiko naiz. Hau hilabete lanpetsua...
Zorionak Hortzmuga Teatroari eta, bereziki, Julen Gabiria idazleari. Lan horrekin asko gozatu nuen eta nahiz eta zailtasun batzuk izan, oraindik eztakit nola lortu nuen ordubeteko banda sonora bat hiru astetan konposatzea eta grabatzea.
Hemen banda sonoran idatzi nuen pieza orkestala entzun dezakezue:
Euskarazko lanik onenaren kategorian irabazlea izanik, sari merezitua dela deritzot, ez musika egiteagatik soilik, Julen Gabiria eta Hortzmugaren lana oso ondo ezagutzen dudala baizik eta azkenengo hamarkadan zehar oztopo anitz gainditu dituztela badakidalako.
HemenLabayruk egindako elkarrizketa ederra, eta hemen fitxa artistiko eta teknikoa.
Euskalduna Jauregiak 10 urte bete ditu eta, hori ospatzeko, obra sinfoniko bat agindu zidaten. Innevento, Astondoa eta Hortzmuga Teatroa konpainiei eskertu behar diet gauza berezi bat: Behingoz nire musika "ikusi" det. Suziriak, argiketa, antzezlariak, itsasontzia, ura bera... osagai magiko guzti horiek nahastu dituzte koreografia zoragarri batean eta nire musikarekin batera. Lan honek - "Euskalduna 10" - asko poztu nau benetan. Lan orkestalak nik gehien preziatzen ditudanak dira eta aukera hau probilegiatua zan, hola eskenatoki urbano bat barne, itsasadarra, itsasontziak eta nire musika milaka eta milaka watiotan anplifikatuta, kalen baitzen.
Hemen entzun dezakezue
Komunikabide frankotan argitaratu dute, batzutan "el compositor bilbaíno" esanez, besteetan "el joven compositor vasco", etab. Nahiz eta musikari profesionala izan, enaiz ospetsua medioetan, eztakite ni nola tratatu beraz. Zeoze beti esan behar dute, hori bai, "el joven", "bilbaíno"... eta dana hori hain errelatiboa da niretzat...
Urtarrilak lauan estreinatuko da Hortzmugaren azkenengo lan eder hau. Julen Gabiriaren liburu batean oinarrituta, berak egin du gidoia, Jose Ibarrolak eszenografia (eta diskaren azala) eta neuk musika. Obra honetarako kasting bat antolatu genuen musikari berezi bat lortzeko asmoarekin eta 30 musikari frogatu ostean (haietako anitz oso trebeak ziren), David Larrinaga hautatu genuen, bere talentu eta ikerketa musikalagatik.
Davidek, saio guztietan, sitarra, armonika melodikoa eta gitarra joko ditu zuzenean. Bere ahotsarekin ere, itzelezko giroa sortzen du Indian ikasitako teknika batzukin.
Hemen pista bat eskegi det (Davidek armonika melodikoa jotzen du):
Banda sonora - 9 doinuz osatuta dago - hilabete honetan idatzi det eta grabaketan parte hartu duten musikariak hauek izan dira:
Aritz Urrutia- baxua
Ernesto Ruiz - darbuka, kajoia
David Larrinaga - Ahotsa, ahosoinu melodikoa, sitar
Malen Zobaran - Trikitixa
Naia Gómez - Arrabita
Lander Ruiz - Klarinetea
Shanti Basauri - gitarrak, pianoa eta programazioa
Ortuellako "Groove" estudioetan grabatu genuen, Alvaro García teknikariarekin.
Azkenengo asteburu honetan Alcorconera joan ginen Hortzmuga Teatroakonpainiarekin, "Momento" obra berriz antzezteko.
Oso saio zaila izan zen, antzerki girorik etzegoelako, baina oso gauza surrealistak gertatu zitzaizkigun. Haien artean, gutako batzuk poliziaren eskolta eduki genuen Móstoles eta Alcorcón hirietatik, eta afaltzeko, ordez, gau ederraz gozatu genuen Trapu Zaharrak konpainiako kide batzukin.
Móstoles ezagutzen nuenez, bisita berezia izan zen enetzat, baina berotasunak kordokatu ninduen.
Izen horrekin ospatu zen ikuskizun politiko bat (ebento guztiak politikoak izan ohi dira) Barakaldoko Bilbao Exhibition Center-en, ekainaren 14an. Hiruz palau egun baino besterik enuen moldaketa orkestal bat egiteko, azken orduko agindua izan baitzen. "Jeiki jeiki" abesti herrikoia zan doinurik garrantzitsuena, eta moldaketa xume bat egin behar nien Gaudeamus abesbatzakoei, oso entseu gutxi baitzezkaten. Orkesta nik neuk grabatu nuen eta koroak zuzenean abestu zuen. Juli Foruriak, Gaudeamus koralaren zuzendaria, benetan lan ederra egin du urtetan zehar Busturialdeko ahots gazte guzti hoiekin, haur abesbatzarik onena lortu arte. Miresgarria benetan, dakaten ospe on osoa merezi dute. Hantxe beste enpresa ezagun batzuk aurkitu nituen, eta Audiomiceko soinu teknikari batzuk agurtu ahal nituen. Ene lana, izatez, bukatuta eta emanda zegoen astebete bat lehenago bainan "playbackez" arduratzen nintzanez, Audiomiceko Endika eta Jimyrekin egon nintzan uneoro. Izugarrizko muntaia eraman zuten eta, nahiz eta sospresa esperoezin batzu egon, haiek haien lana maisuki egin zuten. Enetzat tamalgarriena izan zan asti nahikorik ez eukitzea orkestazio potenteago egiteko eta artisten arteko ezberdintasuna. Gaudeamus korala lehendabiziko mailakoa da bere sektorean, zeuden akrobatak bezalakoak, baina ikuskizuna gehiegi luzatu zan dantzari amateur batzuen ondorioz. Dana luzeegia izan zan eta espektakuloaren erritmoa etzen zainduta izan. 14.000 lagun bildu ziren (ikusi argazki hau). Baliabide anitz baina balio eskasa agertokian. Hori bai, nik egin nuen musika (nirea zena, ez bakarrik herrikoia zena) aurkitu det haien gaur egungo iragarkuntzan erabalita. Bideo hontan dakazue, kalitate txar-txarrez.
"Momento" obran lan egiten degunok berriz batu gera, Valladolid eta Leioako jaialdietan erakusteko. Leioako Umore Azokan euriak saioa moztu zuen tamalez, eta konpainia frankok patu berdina sofritu zuten. Valladoliden, ordez, bi saio geneukan eta lehendabiziko egunekoa egitea lortu genun. Bigarrengoa suspenditu behar zan.
Valladolid oso hiri bitxia da, benetan interesgarria bere historia eta arkitekturagatik. Argazki anitz egin nitun eta jaiki zoragarri batzuk aurkitu genitun. Hango antolakuntza txit potentea da, eta nik ezagutu ditudan jaialdien artean azpimargarrienetako bat dela deritzot. Artistak eta teknikariak ongi tratatuz gain, kalitatezko publikoa baita. Azkenengo bidai hauetan, hiru etorriberrien agerreraz gozatu degu. Leire Ucha aktorea alde batetik, eta Alberto Baños (oboe) eta Malen Zobaran (piano) musikariak, obra berezi honetara primeran egokitu direnak. Neretzat haiekin lan egitea oso lasaigarria izan da, bidaietan elkarbizitza errazten dutelako eta oso musikari trebeak direlako. Mila esker!. Alberto gurekin geratuko da hemendik aurrean bainan Malen saio hauek egitera jin zan soilik, Ales Larrazabalen ordezkoa izan baita egun hauetan. "Momentu" obra Alcorconera eta Poloniara eramango degu laister.
Argazki guztiak, bat izan ezik, nik egindakoak dira. Ene bizitzaren txoko batzuk dira bainan argazki kamara txar batekin aterata.
Hauetako baten bat gustatzen bazaizu, eskaidazu otoi. Dohainik bidaliko dizut.
Castellano
