Shanti Basauri

"Superplast"

"Superplast" izeneko obra bukatu eta estreinatu degu. Hortzmugaren ideia dibertigarri baten bidez, Julen Gabiriak idatzitako supergidoia, Raul Canceloren superzuzendaritza eta superaktoreen lana kalen dago azkenik, zure superherriko superplazan.

Oso lan indartsua izan da musika osoa konposatzea eta grabatzea aste gutxi batzutan, bainan merezi du. Benetan gustora lan egin det, ordu anitzez osatutako egun (aste) guzti hoietan zehar, eta arras pozik geratu naiz ondorioarekin.
Raul Cancelo (Hortzmuga) zuzendariarekin eta Julen Gabiria idazlearekin eduki dudan bidai surrealista hau oso emankorra izan da, nahiz eta lan pila bat izan. Haurrentzako egindako antzerkia nahiko zaila da, publiko ankerra dakazulako ugaritan, eta kalean egindakoa.. askoz zailagoa. Hortarako benetazko profesionalak behar dira, kondairak amesteko, kontatzeko, indar guztiak batera jartzeko ekoizpenaren aldetik eta publikoaren profila ongi ezagutzeko. Honetarako, Hortzmuga Teatroa konpainia trebeena da. Zalantzarik ez.

Mila esker, Raul eta besteak (aktore maitagarri hoiek: Iñaki, Aritza, Arantza eta Argia) aukera hau berriz emateagatik. Komikia, superheroiak eta antzerkia dana batera... nola galduko nuen nik ba? Ene haurtzaroaren islada bat da!

Laister "Superplast" obrantzako egindako musikaren mp3 bat jarriko det hemen. Ordurarte, begiratu zuen agenda kulturala!

Bilboko Ihauteriak 2008

Sardinaren "hileta" (erreketa).
Atzo aktore eta musikari pila bat batu ginen Bilboko aratusteen bukaera antzezteko. Musika osoa nirea zan eta azkenengo unerako, ordez, "Agurra" dantza herrikoiaren moldaketa berezi bat prestatu genuen, txistu, eskusoinua eta tronpetarentzako.

Dana ondo atera zan eta oso giro ona izan zen alde zaharreko kaletan. Larrua ekoizleen lan honetan egon ginen musikarion izenak hauek dira:

- Ales Larrazabal: Eskusoinua.
- Ion Celestino: Tronpeta.
- Ivan Allue: Whistle, gaita nafarra eta txistua.
- Shanti Basauri: Perkusioa.

Aste honetan zehar oso gaixorik egon naiz, sukarrak jota, bainan saioan berpiztu nintzan nolabait. Nahiz eta oso ongi zainduta egon, eztarria eta hotza izan dira errudunak, betiko lez. Geroztik, txit ondo egin nuen lo.

Ionek (tronpetaria) bere taldearen esteka ezagutarazi zigun: The Foralettes (myspace).

Argazkia: Pío Ortiz de Pinedo (Larrua Creaciones).

"Die in diem", Bartzelonan

Bartzelonako Fundació Joan Miró-n estreinatu zen ene azkenengo pieza txiki hau. BBVA-k enkargatuta eta Inneventoren ekoizpen ausart baten bidez zuzenean jo genuen, musikari trebez osatutako laukote bati esker.

Argazkian, Ales Larrazabal (piano), Joe González (klarinete baxua) eta hirurok (ni Gong eta atabal piccolorekin) azaltzen gara bainan aldi berean Izaskun Kintanaren (soprano) ahotsa indartsuaren agerrera bagenekan, hotzaren aurka gatazkan.

"Miró en familia" erakusketa zabaltzeko ekitaldia berezi bat antolatu zuten Inneventokoek, eta nik, aldi hontan, latinera hizkuntza hautatu nuen obraren hitzak osatzeko.
"Die in diem", egunez egun.
Salmo galdu batetik atera nuen hau:

"Noster homo corrumpátur tamen is
Qui intus est renovátur… de die in diem"

Nahiz eta gure baitan, kanpoko gizakia desegiten hasi,
barnekoa berritzen doa.. egunez egun.

"Moment0", Catalunyatik Euskal Herrira

Azkenik "Moment0" antzezlanaren estreinaldia iritsi zan eta Viladecanseko Jaialdian egon ginan, lan zail hau aurkezten. Hortarako, guztiok Viladecansera jun ginan, antzezlariak eta musikariok, ekain gogor bat igaro ta gero.
Hilabete hortan denetarik gertatu zan: gaixotasun larriak, entseu asko, eta ohizko euskal antzerkiaren gabezi oroen erakuspenak.

Kataluniatik itzuli eta gero, Lekeitioko Kale Antzerki Jaialdian egon ginan eta han benetazko estreinaldi bat egiten ari ginela sentitu nuen. Geroztikan, Bilboko Kalealdian azaldu ginan, Katedralen inguruan.

"Momento" antzezlana, beste egitasmo baten atala da, Hortzmuga konpainiak planifikatutako obra baten lehenengo atala hain zuzen ("Cónsules de la calle"). Abentura honetan Ales Larrazabal (pianoa) eta Joe González (klarinetea) ere egon dira, ene musika zuzenean jotzen.
Udaroa igaro eta gero, emanaldi berri batzuk eskeiniko ditugu.

Betizu Jaia 2007

Gaur Bilboko Parkean (Dña. Casildan) lan egiten egon gara. Betizuren eguna zan eta hortarako festa erraldoi bat prestatu dute Bizkaiko hiriburuan. Hortik ibili dira pailazoak, antzezlariak, dantzariak (Ainhoa eta Maríari agur bero bat), teknikariak, zerbitzariak, sukaldariak... eta gu: Joe Gonzalez, Ales Larrazabal eta hirurok behin eta berriz abentura surrealistatan (ta onak) sartuta.
Inneventoren ekoizpen honetan birziklatutako gauzakiak erabili ditugu perkusiozko tresnen moduan. Latak (hutsik eta dilistaz beterik), kartoizko kutxak, etab. erdibanatu dituzte haurren (eta gurasoen) artean, bi talde handi osatzekotan eta hortxe - eskenatoki nagusian - egon gara, eguzkipean, irakasten, jotzen eta arraro xamarrak sentitzen.

Oso giro ona zegoen eta lagun batzuk ikusi ditut hor goitik. Ea datorren urtean gehiago gozatzen degun, eta batez ere gurasoek gehiago ikasten duten, haiek umeentzako lehendabiziko adibidea direla ezbaitira ohartzen.
Eguna oso ongi bukatu da, atzo bukatu zen moduan. Ezinhobea.

"Zirko Iluna" eta "Eva vs Eva"

Hau ez da estreinaldi bat bainan oharra ipintzeak merezi du. Gaur Mungian "Zirko Iluna" ikuskizuna ikus dezakezue, arratsaldeko sei t'erdietan. Haurren antzerkia da, oso kondaira polita batekin, eta Hortzmuga Teatroak asmatutako pertsonaiak ahaztuezinak dira. Gorka Zeroren jatorrizko gidoia Julen Gabiriak euskaratu zuen eta nik musika jarri nion, obra osoan zehar soinu egiten duena.

Bestalde, atzo Zallan ere "Eva vs Eva" antzezlana eman zuten Hortzmugakoek. Hor ere musika idatzi eta grabatu nuen iaz. Hiru neskato antzezlarik defendutako obra hau helduei zuzenduta dago, gai gogor batzuk aztertzen umore garratz baten bitartez. Dana ere ez da umorea beraz, azkenengo eszenaldietan ikus daitekenez.
Etorkizunean antzezlan hauek nondik ibiliko diren jakiteko, Hortzmuga konpainiaren webguneruntz abiatu.

Atxikimendua, txikien mundua, mundua txikitzen

Arriaga Antzokiak ekoiztutako "Abentura Antzokian" obra bukatu zan. Izugarrizko esperientzia izan da guztiontzat, artista trebez osatutako talde erraldoi honetan.

Aldagelen giroa, entseuak, haurren aurpegiak, piratak, Txan magoa, Soroiz, beste musikariak, jantzien arduradunak, kafe-makina, administrazioan lan egiten dutenak, teknikariak, Txukus, Joe, Juanjoren burutaldiak, barneko megafonia, Julenen gidoia, eszenografia, eta... pertsonaiak.

Hemen, erretinan grabaturik, daramatzat Palindromo, Anizeto Alfabeto, Ipuin-kontalariak, Beldurra eta abar.
Han behin negar egin nuen.
Bi aldiz igo nintzen azkenengo solairura lo egitera.
Hiru aldiz erosi nituen sarrerak.
Lau aldiz izkutu nintzan sustoak emateko.
Bost aldiz pianoa jo nuen bakardadean.
Sei aldiz edo handikan jan nuen.
Zazpi aldiz ikusi nuen euskarazko bertsioa, osorik.
Zortzi aldiz esan nien etxekoei juteko.
Bederatzi aldiz gorroto nuen Txukusen eskusoinua.
Hamar mila aldiz barre egin nuen.

Arriaga Antzokian

Udaberria entseuez beteta hasi ginan. Musikariok, antzezlariek etab. oso gogorki eta gustora lan egin degu "Abentura antzokian" obra berria betetzeko eta, azkenik, estreinaldiaren datak iritsi dira.

Ekoizpen hau Bilboko Arriaga antzokiarena da eta hiru ataletan ezberdintzen da. Nik lehenengoaren musika idatzi det, Hortzmugaren "Alfabeto A" obran hain zuzen ere. Julen Gabiria idazle trebeak gidoi poetiko bat idatzi du eta Jose Ibarrolak ere izugarrizko lana egin du irudi eder asko eraikitzen.

Musikagintzaren aldetik, Joe Gonzalez (klarinetea eta saxoa) eta Ales Larrazabal (pianoa eta eskusoinua) musikariekin berriz lan egitea txit ohore handia izan da. Haiek ene partiturak goratzen dituzte egunero, antzokiaren funtzio bakoitzean.
Lan talde (musikariak, antzezlariak, teknikariak) liluragarri bat eta gune berezi bat: Arriaga antzokia, osorik bahituta guretzat.

Maiatzaren bukaera arte ikus-entzun dezakezue han.

Guggenheim-en

BBVA-k enkargatutako ebentoa geldiarazi behar genuen azkenean. Euria izan zan errudun nagusia eta benetan tamalgarria izan da, lan osoa eginda baitzegoen.

Enekin beste 10 musikari zeuden Hortzmugak eta Inneventok ekoiztutako lan honetarako. Aldi honetan ere, dantzari batzuk, antzezlari ugari eta Astondoa piroteknia bazeuden prest gau berezi bat egiteko.
Hurrengoan museo eder hau konkistatuko degu menturaz...