Shanti Basauri

Agur Marijaia

Bart "Agur Marijaia" abestia estreinatu zen, Bilboko Aste Nagusiko azkenengo gauan.
Musika ekainean idatzi nuen eta uztailan grabatu genuen, Julen Gabiriak egindako olerki ederrarekin batera.

Grabaketa "Groove" estudioetan egin genuen eta Alvaro García eta biok arduratu ginen ekoizpenaz.

Hainbat musikarik hartu zuten parte, haien esperientzia eta jakinduria gehituz:

- Oreka TX (Harkaitz eta Mikel: txalapartak eta plastikozko bidoia)

- Aritz Urrutia (baxua)
- Ernesto Ruiz (bateria eta tinbalak)
- Malen Zobaran (trikitixa)
- Ivan Allue (alboka eta tin whistle)
- Eunate Vilches (tronpa)
- Shanti Basauri (gitarrak eta teklatuak)

- Txuma Murugarren (ahotsa)
- Amaia Zubiria (ahotsa)
- Sorkun (ahotsa)
- Eñaut Elorrieta (ahotsa)

Atzoko soinuarekin etzan ongi entzun eta abestiaren hedapena beranduegi hasi zela deritzot baina, datorren urtetik aurrera, aukera gehiago edukitzea espero det.
Ikuskizuna Inneventok ekoiztuta eta Hortzmuga Teatroak antzeztuta izan zen.

Grabaketan egon diren parte hartzaile oroei eta ondoko lagunei haien laguntza eskertu nahi diet:

- Inneventoko jendea
- Raul Cancelo (Hortzmuga)
- Larrua
- Estudiotik pasa diren musikari guztiak
- Ikeguchi Yutaka
- Alvaro García
- Abestia jarri duten irrati gutxiei
- Oreinak taldeko lagunei
- Busturiko etxekoei

Eguneratuta

Pasa den egunean webgune hau eguneratu nuen, "MP3" kategorian mp3 gehiago sartuz, batik bat. Aipatuta zeuden lan batzuk etzekaten entzunda izateko aukerarik eta, kasu batzutan, egoera hori hoberatu det.

Hor ezkerrean dagoen estekan (Mp3), aurki daitezke azkenengo lan batzuetako doinuak, sarrera bakoitzean barne.

Michael Jackson hil da

Txorrakeri asko esango dute, xelebrekeriak aipatuko dituzte, bainan oso gutxik hitz egingo dute musikari honen talentoari buruz.

Gaur berandu enteratu naiz baina beste musikari batzukin hitz egin det eta guztiok gauza bera komentatu degu: Ez ginan fanak, "Thriller" diskatik bere diskoak etziran interesgarriak guretzat... baina guk orok errespetatzen genuen.
Niri Jackson Five taldea asko gustatu zait, disko guztiak dauzkat, eta mutiko hau (beti haurra izan da) oso talentotsua zela deritzot.
Gizarteak, monstruoari - eta Michael Jackson monstruo bihurtu zan 1984tik aurrera - pekatu guztiak leporatzen dizkio. Notre-Dammeko kanpaien artean izkutatzen danari, laku batean bere isladari so egiten dion horri, edo haurtzarorik gabeko pertsona makal honi.
Industriak izarrak sortzen eta sakrifitatzen ditu.

Baina tipo hau, gaztetan, benetazko musikaria zan. Gaixotasun ilun batzutan (apika gizarteak sortuak direnak) erori baino lehen, mundu osoak miresten zuen. Diseinu berriko lapurrak haien lana hasi baino lehen, bere ahotsez eta dantzaeraz gozatzen genuen.

Zein erraza den epaitzea. Zein erraza besteen talentua zapaltzea edozein aitzaki sinestezin batez.
Bart musikari bat hil zan. Ziur nago munduan beste asko ere hil zirela.
Izar honen argiaren aurrean itsuak bagara... nola bereiztuko ditugu beste talentu guzti horiek, ospetsuak eztirenak eta atzo bezalako egun batean hil zirenak?

"Olympikas 2012"

 Hortzmuga Teatroa konpainiak 20 urte bete ditu aurten, eta ospatzeko, erakusketa berezi bat prestatzen ari dira. Gainera, haien lana etengabekoa denez, klown obra bat estreinatuko dute Viladecanseko Antzerki Festibalean: "Olympikas".

Zsutroia Hondo, Hetta Miller, Rula Tagarroto eta Odin Parkman kirolariak Arkadia herrikoak dira eta haien kirol xelebreak eraman nahi dituzte hurrengo Olinpiadetara. Hortarako, guztion sinadura behar dute, sinesgarritasuna nolabait lortzeko.

Arkadiako "Himnoa" egitea eskatu zidaten eta horixe izan da nire oparia haien hogeigarren urtebetetzeagatik. 

Hemen ereserki orkestal hau entzun dezakezue:

Zorionak Hortzmuga!

"5.1" obraren estreinaldia, Bilbao Exhibition Centeren

 Bart ene azkenengo obra sinfonista estreinatu nuen, musikari trebez inguratuta, Gaudeamus abesbatzarekin, Kukai dantza konpainiarekin, etab.

B.E.C.-en antolatutako EFEF (European Future Energy Forum) kongresuaren hasiera ospatzeko agindu zidaten.
Ekoizpena, erraldoia zena, Inneventoren eskuetan zetzan, soinua eta argiketa Audiomicek egin zituen eta plazer handia izan zen Jon Maya (Kukai), Juli Foruria (Gaudeamus, abesbatzak oso lan ona osatu zuen) eta besteekin lan egitea.

Hemen entzun dezakezue:

Aipatutakoez gain, nirekin agertokian egon ziren musikariak hauek izan ziren:

- Mikel Ugarte & Harkaitz Martínez (Oreka TX, txalaparta)

- Aritz Urrutia (baxua)

- Ernesto Ruiz (tinbalak eta darbuka)

- David Larrinaga (sitar eta ahotsa)

- Gaudeamus (haur abesbatza)

Oso hilabete estresantea izan da, Japoniatik itzuli eta obra hau konposatu eta zuzendu behar (eta prozesuaren erdian Alemanian eta Frantzian egindako lana) baina merezi izan du.
Dana ondo irten zan, artista eta teknikariek ondo egin zuten eta publikoari asko gustatu zitzaion. Artista gehienekin esperientzia luzea neukan eta niretzat berriak izan direnak ezinbestekoak bihurtu direla aitortu behar det.

Laster bideo bat jarri ahalko det baina, oraingoz, argazkia klika ezazue, ikuskizunaren magnituteaz ohartzeko. Obrak 12 minutu dirau eta denbora hortan denetarik gertatu zen agertokian.

Eta orain, Frantzian

 Aubagnen egon ginen asteburu hontan, "Momento" obraren azkenengo saioan.
Herri bitxia, azoka itzel batekin eta, Holzminden herriarekin parekatuz, garestitxua.
Antzezlan hau anitz aldatu da azkenengo saioetan zehar, zehatzagoa bihurtu baita, argiagoa esan genezake.
Frantziar webgune honetan argazki batzuk jarri dituzte, guretzat agurpen irudiak izan daitezkeenak.  
Antzezlan honetarako egin nuen musika, orain dela hiru urte edo, asko aldatu da eta, azkenean, pena emango dit agurtzeak. Batez ere, pianoaren partiturarekin nahiko pozik geratu nintzen eta tresna horretan eduki ditugun interpretekin (Ales Larrazabal eta Malen Zobaran), maisuki defenditu zutenak, oso une bereziak bizi izan ditut.
Eskertzekoa da ere, Joe Gonzalezen lana klarinetearekin, eta Alberto Bañosena, deskubrimendu ederra izan dena, oboista moduan bai eta arlo pertsonalean ere.

Azkenengo bidai honetan kide hauek egon ginen, Larruako Pío Ortíz de Pinedo eta Hortzmugako Raul Cancelorekin batera:

Antzezlariak

Leire Ucha

Pako Revueltas

Enriqueta Vega

 

Musikariak

Alberto Baños (oboe)

Malen Zobaran (piano)

Shanti Basauri (gitarra)

Aubagnen bertan beste konpainia euskaldun bat topatu genuen, Gaitzerdi, haien "Otsoko" obrarekin.

Orain, Alemanian

  Holzminden herrirantz abiatu gera, "Momento" antzezlanarekin. Herria, eguraldia, giroa eta jendea hobezinak dira.
Lau egun hauetan bi saio eskainiko ditugu hemengo Festibalean eta datorren astean Frantziara jungo gera, Marsella aldean dagoen herri batera.

Holzminden Hannoverreko eskualdean dago eta hemen dauzkaten ezaugarririk goxoenak saltxitxa eta mustarda naturalak dira. Zalantzarik gabe.

Jatekoaz gain, denbora profitatu det abesti bat egiteko Oreinak taldearentzat eta, hemendik itzuli eta gero, BEC-en estreinatuko dudan obrarako entseuekin hasiko naiz.
Hau hilabete lanpetsua...

Berriz Japonian

 Behin eta berriz Japoniara itzultzen naiz.
Hemen etxean bezala sentitzen naiz, agian benetazko etxerik ez daukadalako edo, behar bada, "urruneko" gizarte honetan ondoegi egokitzen naizelako.

Japonia niretzat ezinbestekoa da, Zarautz bezala, eta nire bizitzaren zati garrantzitsu bat dela aitortu behar det. Zarautz bezala ere, batzutan behar det, arnasa hartzeko eta, batik bat, nere burua berriz ezagutzeko.

Egonaldi honetan Kyoton, Tokyon, Koben, Osakan, Hakonen, Yokohaman, Naran, Himejin eta beste leku batzutan egongo naiz. Haietako batzuk oso ondo ezagutzen ditut, Bilbo ala Donostia bezala, eta beste batzuk berriak izango dira enetzat.

Argazki pila bat egiten ari naiz, betiko lez, eta itzultzean, hor eskuinean daukazuen argazki-bilduman jarriko ditut.
Hor goian ipini dudana Arashiyaman egin nuen. Kyotoko udazkena ezagutzen nuen baina udaberria ez. Eztakit zein den sasoirik zoragarriena.

"Superplast" antzezlanak Max Saria irabazi du!

 Zorionak Hortzmuga Teatroari eta, bereziki, Julen Gabiria idazleari.
Lan horrekin asko gozatu nuen eta nahiz eta zailtasun batzuk izan, oraindik eztakit nola lortu nuen ordubeteko banda sonora bat hiru astetan konposatzea eta grabatzea.

Hemen banda sonoran idatzi nuen pieza orkestala entzun dezakezue:

Euskarazko lanik onenaren kategorian irabazlea izanik, sari merezitua dela deritzot, ez musika egiteagatik soilik, Julen Gabiria eta Hortzmugaren lana oso ondo ezagutzen dudala baizik eta azkenengo hamarkadan zehar oztopo anitz gainditu dituztela badakidalako.

Hemen Labayruk egindako elkarrizketa ederra, eta hemen fitxa artistiko eta teknikoa.

Euskalduna Jauregiaren 10.urteurrena

Euskalduna Jauregiak 10 urte bete ditu eta, hori ospatzeko, obra sinfoniko bat agindu zidaten.
Innevento, Astondoa eta Hortzmuga Teatroa konpainiei eskertu behar diet gauza berezi bat: Behingoz nire musika "ikusi" det. Suziriak, argiketa, antzezlariak, itsasontzia, ura bera... osagai magiko guzti horiek nahastu dituzte koreografia zoragarri batean eta nire musikarekin batera.
Lan honek - "Euskalduna 10" - asko poztu nau benetan. Lan orkestalak nik gehien preziatzen ditudanak dira eta aukera hau probilegiatua zan, hola eskenatoki urbano bat barne, itsasadarra, itsasontziak eta nire musika milaka eta milaka watiotan anplifikatuta, kalen baitzen.

Hemen entzun dezakezue

Komunikabide frankotan argitaratu dute, batzutan "el compositor bilbaíno" esanez, besteetan "el joven compositor vasco", etab. Nahiz eta musikari profesionala izan, enaiz ospetsua medioetan, eztakite ni nola tratatu beraz. Zeoze beti esan behar dute, hori bai, "el joven", "bilbaíno"... eta dana hori hain errelatiboa da niretzat...

Laster bideo bat jarriko det.